Bilboko Udalak beste urrats bat eman nahi du administrazio elebiduna lortzeko, beti ere indarrean dagoen Euskararen Erabilera Planaren barruan. Plan hori 1999an onartu zen eta gaur egun laugarren fasean dago. Bere helburu nagusia da euskara, hizkuntza ofiziala den neurrian, zerbitzuko hizkuntza eta komunikatzeko ohiko tresna bihurtzea.
Era berean, Planak euskararen normalizazioan aurrera egin nahi du, administrazio barruan laneko hizkuntza izan dadin. Horretarako, nabarmena da gero eta udal funtzionario gehiagok daukatela hizkuntza eskakizuna eta euskarazko gaitasun maila handia.
Horrela, bada, Euskara Sailak abian jarri du herritarrekin harreman zuzena dagoen udal espazioetan elebitasuna eta euskararen erabilera bultzatzeko ekimena. Pertsona elebidun bat udal bulegoetara doanean, leku horretan udal langilearekin euskaraz egin dezakeela jakingo du, eta hark euskaraz erantzungo diola. Azken batean, komunikazioa erraztu nahi da.
Horretarako ELEBI logotipoa sortu du (ELEBIk “hizkuntza bi” esan nahi du eta, aldi berean, ELEBITASUNA eta BILBAO terminoekin identifikatzea iradokitzen du). Ikur hori uriko zortzi barrutietako udaltegietako informazio guneetan, udal eraikinetako Informazio Bulegoetan eta Udal Sareko Liburutegietan jarriko da. Ezaugarri horrek jakinaraziko die herritarrei leku horietan euskaraz hitz egingo dietela hala nahi badute.
Euskara Sailak BilbaoArterekin aritu da lanean ELEBI logotipoaren euskarri desberdinak garatzeko, funtzionarioei erabilera errazteko eta informazio leku horietara doazen herritarrek erraz ikus dezaten.
You must be logged in to post a comment.