Bilboko Udaleko Euskara, Gazteria eta Kirol Sailak eta interneteko Nontzeberri kultur atariak "Bilblogari" euskarazko blogen lehiaketako sariak banatu dituzte. Lehiaketan parte hartu duten 45 blogen artean saridunak aukeratzeko orduan, epaimahaikoek kontuan hartu dute bloga egiterakoan eta elikatzerakoan egileek izan dituzten ideiak, irudimena eta trebetasuna. Euskara maila, literatur kalitatea, diseinua, gaurkotze maila eta originaltasuna ere baloratu dira.
Honela banatu dira sariak:
- Blog pertsonala
Irabazlea: Irune Jimenez Gonzalez
Bloga: Nonahi
"Blog honek arte eta tendentzia mota guztiak hartzen ditu bere baitan, oso modu fresko eta dinamikoan, joerarik berrienei erreparatuz. Musika, argazkigintza, diseinua, zinema eta pentsa daitezkeen sorkuntza-esparru guztietara heltzeko asmoz egindako bloga".
- Blog tematikoa
Irabazlea: ex aequo, Asier Gabikagojeazkoa eta Txerra Rodriguez Gomez
Bloga: Asiaren Nondik Norakoak eta Garaigoikoa, Hizkuntzaren soziologia, soziolinguistika eta beste
"Gai mamitsuak jorratzen dituzte saria konpartitzen duten blog bi hauek. Alde batetik, Asiari buruzko ikuspegi sakona eta aberasgarria eskaintzen digu euretako batek, argazkiz eta testuz izugarri ondo hornituta. Bestetik, soziolinguistikari buruzko alderdi guztiak jorratzen ditu saria jasoko duen beste blogak, gai honi buruzko lotura ugari eskainiz eta gure hizkuntzari buruzko gogoeta eginez".
- Taldeko bloga
Irabazleak: Gontzal Zapatel
Bloga: Drogak
"Kontuan hartzekoa da, zinez, gazte talde batek drogen gaia aztertzea euren blogean, bereziki substantzia horiek dituzten efektuetan zentratuz baina ohiko komunikabideek erabiltzen duten alarmismorik gabe, naturaltasunez. Blog hasi berria da, eta espero dugu sari honek balioko duela akuilu gisa, blogak aurrera jarraitu dezan".
- Blog originala
Irabazlea: EH Soundz Taldekideak
Bloga: Epodcast bloga
"Blog originalenaren saria jasoko du, baina ez da soilik originala: blog aparta ere bada. Irrati-kate bat balitz bezala, blog honek hainbat saio jartzen ditu entzulearen esku, podcast eran. Modu horretan, gustukoen ditugun musikak entzun ditzakegu, nahi dugun unean eta nahi dugun moduan. Musikazale guztiek jarraitu beharrekoa".
Blog guztiak jendearen eskuera egon dira eta daude webgune honetan: www.bilblogari.net.
Ikusi ekitaldiko argazkiak:
 |
 |
 |
 |
 |
 |
You must be logged in to post a comment.