Euskara
Español

Euskara ikasi

  1. Hasiera
  3. Zer behar?
  5. Euskara ikasi
euskara ikasi

Zer da euskalduntzea-alfabetatzea?

Euskalduntzea:

Euskalduntzea da euskararik ez dakienak euskara ikastea. Beraien ama-hizkuntza euskera izan ez duten herritarrek joko dute euskalduntzera. Hizkuntza trebetasun guztiak lantzen dira: entzumena, irakurmena, idazmena eta mintzamena. Euskalduntzean euskara estandarra lantzen da nagusiki, euskera batua, eta bere eremuko euskalkiko irakurmenak eta entzumenak ere bai.

Alfabetatzea:

Lehendik euskeraz dakitenei irakurtzen eta idazten irakastea. Euskera ama-hizkuntza izan dutenek eta euskalkiren bat (gure hizkuntza eremuan, bizkaiera) erabiltzen dutenek joko dute alfabetatzera. Gehien landuko dituzten trebetasunak irakurmena eta idazmena izango dira. Alfabetatzean hizkuntza eremuko euskalkiaren arauetatik abiatu eta euskara baturantz jauzia egiten da.

Zeintzuk dira euskara ikasteko aukerak?
Euskara ikasteko dirulaguntzak
Euskara ziurtagiriak
Barnetegiak
Bizkaiera ikasi
Autoikaskuntza ordenagailu bidez
Hizkuntza eskola ofizialak
Euskaltegiak
Baliabideak
Euskara ikasteko dirulaguntzak

Zenbait erakundek euskara ikasteko dirulaguntza ematen dute:

Bilboko Udala

Bizkaiko Foru Aldundia

  • Euskara eskura txartela Bizkaiko Foru Aldundiko Euskara eta Kulturako Foru Sailaren ekinbidea da, Bizkaiko ikasleen euskalduntzea sustatu eta doakotasuneranzko urratsak eman nahi dituena.

Eusko Jaurlaritza

HABEk itzuli egingo du ikasketa aldian jarritako diru-kopuruaren atal bat.

Dirulaguntza eskatzeko baldintza:

Dirulaguntza eskatzeko baldintza hauek bete behar dituzte:

  • Euskaltegi edo euskararen autoikaskuntzarako zentro homologatu batean deialdian zehaztutako epealdian matrikulatua egon izana eta dagozkion matrikula-prezioak euskaltegi edo autoikaskuntzarako zentro homologatuei norberak ordaindu izana.

  • Deialdian zehaztutako ikasturtean HABEren mailaren bat edo baliokideren bat egiaztatu izana.

Eskaera egiteko epea eta prozedura

Epea irailean irekitzen da.

Data horretan, HABEren web atarian irekita egoten da izena online emateko epea.

Informazio gehiago

Hizkuntza Eskola Ofiziala (Hezkuntza Saila)

Hizkuntza eskoletako ikasketetarako ez da dirulaguntzarik ematen.

Euskal Autonomia Erkidegoko Hizkuntza Eskola Ofizialetako matrikula prezioak eta tasak Eusko Jaurlaritzako Hezkuntza Sailburuaren Aginduaren arabera zehazten dira urtero, eta hori kontuan izanik zehazten dira unibertsitateko ikaskuntzak ez diren zerbitzuen prezioak.

Informazio gehiago

Euskara ziurtagiriak

Web gune honetan, Euskara ziurtagiriak atalean ikus daitezke dauden euskara ziurtagiri guztiak eta horien inguruan beharrezkoa den informazio guztia.

Barnetegiak

Euskara ikasteko beste aukera bat barnetegiek eskaintzen dute. Horietan, modu trinkoan ikasi dezakezu euskara. Gainera, zure beharretara eta mailara egokitzen diren ikastaro ezberdinak aurkituko dituzu barnetegietan. Egin aukera dauden barnetegien artean eta ikasi euskara.

Autoikaskuntza ordenagailu bidez

Aukera hauek ditugu ordenagailu bidez ikasteko:

  • Bai & By; multimedia sisteman oinarritzen ditu bere ikastaroak; hau da, norberak ordenagailuz egindako saioak, mintzapraktika-eskolaz eta tutoretza pertsonalizatuaz osatuta.

Euskara ikasten ari direnentzako materiala: bideoak, audioak eta testuak, baita ikasketetan lagungarriak diren beste baliabide batzuk ere: aldizkariak, denborapasak, abestiak, txisteak, irratinobelak, istorio animatuak, errezetak, trikimailuak, ipuinak…

Ikasten.net euskara ikasteko baliabide didaktikoa da, munduko edozein tokitan diren pertsona helduei euskara helarazteko metodologiaz diseinatuta, interfas atsegin eta informalarekin. hiru.eus atariko ekimenetako bat da, eta Eusko Jaurlaritzaren Hezkuntza Sailaren mendekoa.

  • Kaixo: Kaixo.com eta Habek elkarlanean abian jarri duten Kaixo sistemari esker, etxetik eta internet bidez ikasi daiteke euskara. On-line bidezko euskaltegia da Kaixo eta bertan, gramatika ikasgaiak eta ariketak daude. Irakasle baten laguntza ere eskaintzen du programak.

Hizkuntza eskola ofizialak

  • Azalpena

Eusko Jaurlaritzaren Hezkuntza Sailaren menpe daude Euskal Autonomia Erkidegoko hizkuntza eskola ofizialak.

Bilboko Hizkuntza Eskola Ofiziala Deustun dago, eta euskaraz gain, beste hizkuntza batzuk ikasteko aukera eskaintzen du.

Hizkuntza eskolan ikasle ofizial edo libre gisa matrikulatu zaitezke. Ikasle ofizialek ikasturte osoan eskolara joan eta ikasturte amaierako azterketak egiteko eskubidea dute; ikasle libreek, aldiz, ziklo bakoitzeko amaierako azterketak egiteko eskubidea baino ez dute.

  • Hartzaileak: 14 urtetik gorakoentzat

  • Matrikula epea

– ikasle ofizial gisa matrikulatzeko, irailean (ikasturtea urrian hasten da eta ekainerako amaitu).

– ikasle libre gisa matrikulatzeko, otsailean.

  • Matrikula

Euskal Autonomia Erkidegoko Hizkuntza Eskola Ofizialetako matrikula prezioak eta tasak Eusko Jaurlaritzako Hezkuntza, Unibertsitate eta Ikerketa Sailburuaren Aginduaren arabera zehazten dira urtero, eta hori kontuan izanik zehazten dira unibertsitateko ikaskuntzak ez diren zerbitzuen prezioak.

Informazio gehiago

Euskaltegiak

Azalpena

Euskaltegiak helduei euskara irakasteko ikastegi ofizialak dira.

Bilbon hamabi euskaltegi homologatu daude, baina badago egoitza bakarra baino gehiago duenik. Bilboko euskaltegi guztiak pribatuak dira.

Bilboko euskaltegi guztiak HABEk homologatuta daude; horrek esan nahi du edozein euskaltegitan emango duten ikastaroa HABEren curriculumari jarraituko diola.

Euskaltegi bakoitzak eskaintza zabala du ordutegi eta ikastaro motaren arabera (egunerokoa, trinkoa, barnetegia…), eta bertaratuta edo autoikaskuntza bidez ikasi daiteke.

  • Hartzaileak: 16 urtetik gorakoak.

Curriculuma

HELDUEN EUSKALDUNTZEAREN OINARRIZKO CURRICULUMAk (HEOC-digitala.pdf) —HEOCak— helduen euskalduntzegintzaren jardun didaktikoan betebeharreko gidalerroak deskribatzen eta zehazten ditu. Hezkuntza, Hizkuntza Politika eta Kultura sailburuak Agindu bidez ezarri zuen 2015eko uztailaren 22an curriculum hau, erreferentzia-marko izan dezaten euskaltegiek, euskararen autoikaskuntzarako zentroek, HABEk eta HABErekin lankidetzan arituko direnek, eta 2015eko uztailaren 31n argitaratu zen EHAAn (144 zk.).

Helduen Euskalduntzearen Oinarrizko Curriculuma sei mailatan egituratua aurkezten da; elkarreragin soziodiskurtsiboan ardaztua, hizkuntzaren ikuspegi komunikatiboan oinarritua, ekintza komunikatibotan definitua, eta euskararen ezaugarri eta egoera soziolinguistikora egokitua.

Oinarrizko curriculum honek indarrean jartzen dituen euskararen sei gaitasun-mailak (A1, A2, B1, B2, C1 eta C2) Europako Kontseiluak onartutako Hizkuntzen Erreferentzia Marko Bateratuan zehaztutako mailen gidalerroetan oinarritu dira, eta euskararen ezaugarri eta egoera soziolinguistikora egokitu.

Horrela, hiru lerrunetan bildu dira sei maila horiek:

    • Oinarrizko lerruna (A1 eta A2): oinarrizko erabiltzailea

    • Lerrun aurreratua (B1 eta B2): erabiltzaile aurreratua

    • Adituaren lerruna (C1 eta C2): erabiltzaile aditua

Mailak

a. Oinarrizko lerruna (A1 + A2): Oinarrizko erabiltzailea

Oinarrizko lerrun honen xedea honako hau da: ikasleak eguneroko gaiei buruzko euskarazko testu laburrak ulertzea, eta ahoz zein idatziz —baina gehienbat ahoz— euskara elkarreraginean erabiltzea, labur eta sinple, baina egoki eta eraginkor.

b. Lerrun aurreratua (B1 + B2): Erabiltzaile aurreratua

Lerrun aurreratuaren xedea honako hau da: ikasleak ohiko testuinguru, gai eta egoera ezagunetan instrukzioak, kontaketa laburrak eta azalpen-testuak ulertzea, eta, ahoz zein idatziz, euskara zehaztasunez eta eraginkortasunez erabiltzea. Xede ere izango da ikasleak elkarreraginean, bere lan-esparruko gaiei buruz, alderdi esanguratsuak eta xehetasunak bereiziz, deskribapenak egitea eta azalpenak eta iritziak eraginkortasunez ematea.

c. Adituaren lerruna (C1 + C2): Erabiltzaile aditua

Adituaren lerrunaren xedea honako hau da: eremu profesional, publiko zein pertsonalean ikasleak era guztietako informazioa euskaraz trukatzeko gai izatea era landu eta jantzian, ahoz zein idatziz, gaia, solaskidearen jarrera edota euren arteko harreman maila zeinahi delarik, hizkuntza-adierazleak estrategikoki erabiliz eta hizkeraren maila denotatiboa eta konnotatiboa bereiziz.

  • Mailen azpimailak

Helduen Euskalduntzearen Oinarrizko Curriculumean zedarritutako sei gaitasun-mailen ikas-irakas prozesua egituratzeko bereizi dira azpimailak.

Hizkuntza-trebetasunetan oinarritzen dira azpimailak, eta trebetasun hartzaileak eta ekoizleak integratzen dituzte. Ikastaroen ezaugarrien eta ikas baldintzen arabera, azpimaila horiek lortu beharreko helburuen adierazle izango dira.

Informazio gehiago

Menu