Bilbon unibertsitatez kanpoko 142 ikastetxe daude.

Euskarazko ereduetan matrikulatu diren umeen kopurua asko igo da azken urteetan. Haur Hezkuntzan eta Lehen Hezkuntzan matrikulazio osoaren %90 inguru da D eta B ereduetakoa. Ikastetxe askotan eskaintza egokitzen ari dira, eta eredu batetik beste baterako pausua ematen dabiltza; horregatik, gertatu daiteke zerrendetan ikastetxe batean B eta D ereduak, biak ematen dituztela jarri, baina ereduetako bat desagertzera joatea.

Ikastetxe guztietatik 125etan euskarazko ereduak ematen dira; D eredua edo B eredua, edo biak, ikasketa mailaka banatuta.

• Araubide Orokorreko ikastetxeetan ematen diren irakastereduen kontsulta (D eta B ereduak)

Informazio hori eta gehiago Eusko Jaurlaritzaren Hezkuntza Sailean

Bilboko ikasleen artean euskarazko irakaskuntza bultzatzeko matrikulazio kanpaina hau antolatzen da urtero.

• Nahi dudalako!

Horrez gain, D eta B eredua ematen duten ikastetxeekin lankidetzan, ikasleen artean euskararen erabilera bultzatzeko programak ere antolatzen dira, besteak beste:

• Rafael Mikoleta ipuin lehiaketa
• Zinema euskaraz
• Mundu bat bertso
• Xiba-Bilbon Herri jolasak euskaraz

Eusko Jaurlaritzako Hezkuntza Sailak  eta EUSTATek eskainitako datuen arabera, hauxe aipatu dezakegu:

Apurka-apurka hazten joan da Araubide Orokorreko Irakaskuntzako ikasle-kopurua, baina azken datuen arabera jaisten doa.

2001-2002 ikasturtean Bilbon 50.189 ikasle zeuden Araubide Orokorreko Irakaskuntzan. Kopuru hori urtero handitzen joan da eta 2015-2016 ikasturtean 55.568 ikaslera iritzi zen. 2015-2016 ikasturtetik 2017-2018 ikasturtera ikasle-kopurua 750 pertsonatan baino gehiago jaitsi da.

– Euskarazko ereduek izan duten hazkundea Bilbon.

Hezkuntza sistemaren barruan ditugun ikasketa maila bakoitzean, euskararen irakaskuntzak duen presentzia aintzat hartuta, 4 hizkuntza-eredu hauek ditugu: A, B, D eta X ereduak.

D eta B ereduak euskarazko eredutzat ezagutzen dira. D ereduan ikasgaiak euskaraz ematen dira, eta B ereduan, euskaraz eta gazteleraz. Hala ere, gaztelera eta gaztelerazko literatura, euskara eta euskal literatura eta hizkuntza modernoak beren jatorrizko hizkuntzetan irakasten dira.

2001-2002 ikasturtetik 2017-2018 ikasturtera nabarmen handitu da euskarazko ereduetan ikasten duten ikasleen kopurua. 2001-2002 ikasturtean A eredua zen nagusi ikasle guztien %53arekin; 2017-2018 ikasturtean, aldiz, B eta D ereduek gainditu egin dute A ereduko ikasle kopurua, %28 eta %45 ikasle-kopuruarekin. Bi ikasturte horien bitartean A ereduak 13.000 ikasle inguru galdu ditu, hain zuen ere, euskarazko ereduek irabazi dutena. Hazkunde hori ikasmaila guztietan nabaritu izan da, baina, nabarmen gehiago, Haur Hezkuntza edo hasierako mailetan. Haur Hezkuntzako datuetan ikusi daiteke D eredua nagusitu dela; aurreko ikasturteetan eskolaratze prozesura sartzen diren haurren %64a (2017-2018) eredu horretan egiten dute, eta %31k, B ereduan.

Haur Hezkuntza igaro eta ikasmailetan gora doazen heinean, euskarazko ereduetako ikasle-kopurua ere handitzen doa Derrigorrezko Bigarren Hezkuntzara arte. Batxilergoan eta Lanbide Heziketan halako muga bat nabari da, urteen joan etorrian emandako bilakaera ez baitator bat aurreko ikasmailetan D ereduan ikasi duten ikasleen kopuruarekin. Esaterako, Lanbide Heziketan ikasleen %11k (2017-2018) ikasten dute B edo D ereduan eta gainontzekoek A ereduan.